Studentët e Kolegjit Tempulli përfundojnë me sukses Shkollën Verore në WU Vienna dhe pajisen me certifikata ndërkombëtare

Studentët nga Kolegji Tempulli kanë përmbyllur me sukses pjesëmarrjen në Shkollën Verore 2025 për Transport Publik pa Barriera (Barrier-Free Public Transport), të organizuar nga një ndër universitetet më prestigjioze në Evropë – WU Vienna University of Economics and Business në Austri.

Gjatë kësaj jave intensive, studentët patën mundësinë të ndjekin ligjërata dhe të marrin pjesë në punëtori të mbajtura nga profesorë e ekspertë ndërkombëtarë, si dhe të shkëmbejnë përvoja me pjesëmarrës nga vende të ndryshme të botës. Programi i fokusuar në zhvillimin e një transporti publik të qasshëm dhe gjithëpërfshirës i ndihmoi ata të thellojnë njohuritë dhe të shohin nga afër zgjidhjet më të avancuara në këtë fushë.

Në përfundim të shkollës verore, studentët u pajisën me certifikata ndërkombëtare, të cilat janë një dëshmi e angazhimit dhe përgatitjes së tyre profesionale në drejtim të zhvillimit të një transporti publik pa barriera.

Ky është një tjetër hap i rëndësishëm në rrugëtimin akademik dhe profesional të studentëve tanë, të cilët kthehen në vend me më shumë dije, përvoja dhe motivim për të kontribuar në krijimin e një transporti publik të qasshëm për të gjithë.

Kolegji Tempulli falënderon partnerët ndërkombëtarë për këtë mundësi të vlefshme dhe vazhdon të mbështesë studentët drejt rrugës së tyre për t’u bërë profesionistë të suksesshëm dhe të përkushtuar.