Mbahet takimi i radhës me partnerët e projektit SEE-GL

Kolegji Tempulli mori pjesë në takimin e radhës me partnerët e projektit SEE-GL (Skills and Employment Enhancement in Green Logistics), një projekt dyvjeçar Erasmus+ për Ndërtimin e Kapaciteteve në fushën e Arsimit dhe Formimit Profesional (AFP).

Ky projekt ka për qëllim të pajisë sektorin e logjistikës në Ballkanin Perëndimor me aftësitë dhe kompetencat e nevojshme për tranzicionin e gjelbër dhe të qëndrueshëm. Ai fokusohet në modernizimin e programeve të AFP-së në transport dhe logjistikë në Slloveni, Kroaci, Bosnje dhe Hercegovinë, Kosovë dhe Mal të Zi, duke iu përgjigjur sfidave urgjente mjedisore, sociale dhe të qeverisjes (ESG).

Gjatë takimit, partnerët diskutuan mbi ecurinë e projektit, zhvillimin e mjeteve të reja edukimi, kurrikulën e përbashkët të bazuar në ESG si dhe forcimin e bashkëpunimit midis sektorit publik dhe atij privat.

Kolegji Tempulli mbetet i përkushtuar në rolin e tij aktiv për të kontribuar në zbatimin e projekteve rajonale që nxisin zhvillimin arsimor, profesional dhe një të ardhme më të qëndrueshme.