Kolegji Tempulli vazhdon lidershipin në trajnime për transport të sigurt. MMPHI i zgjat autorizimin Tempullit deri më 2030 për kurset profesionale ADR

Kolegji Tempulli, institucion i njohur për trajnime profesionale në fushën e transportit dhe të sigurisë rrugore, ka marrë zgjatjen e autorizimit nga Ministria e Mjedisit, Planifikimit Hapësinor dhe Infrastrukturës (MMPHI) edhe për pesë vitet e ardhshme, deri në vitin 2030.

Ky autorizim i mundëson Tempullit të vazhdojë organizimin e kurseve për drejtues dhe manipulues të mallrave të rrezikshme (ADR), të cilat janë programe të akredituara nga IRU Academy. Këto programe trajnuese janë të domosdoshme për shoferët profesionistë që transportojnë mallra të rrezikshme, si dhe për punonjësit e depove dhe pompave të karburanteve që manipulojnë me derivate dhe substanca që kërkojnë kujdes të lartë teknik dhe ligjor.

“Ky është një tjetër konfirmim i besimit dhe profesionalizmit të Tempullit në fushën e transportit. Çdo kursant i certifikuar nga ne është një investim në sigurinë publike dhe në cilësinë e shërbimeve rrugore,” – deklaroi drejtori i Kolegjit, Prof. Muhamed A. Krasniqi.

Gjatë dy dekadave të fundit, Kolegji Tempulli ka kontribuar ndjeshëm në profesionalizimin e operatorëve rrugorë, në rritjen e cilësisë së shërbimeve të transportit, si dhe në respektimin e standardeve të punës dhe të sigurisë në Kosovë. Tempulli mbetet një nga institucionet më të besueshme në vend dhe rajon për trajnime profesionale dhe zhvillim të kapaciteteve njerëzore.