Kolegji Tempulli pranon Certifikatë të cilësisë nga Agjencia e Kosovës për Akreditim

Në kuadër të Konferencës së 3-të Vjetore mbi Arsimin e Lartë dhe Sigurimin e Cilësisë, me temë: “Arsimi i Lartë i Ndërkombëtarizuar: Kapërcimi i Kufijve dhe Bashkimi i Njerëzve”, e organizuar nga Agjencia e Kosovës për Akreditim (AKA), Kolegji Tempulli është nderuar me Certifikatën e Cilësisë, një mirënjohje prestigjioze që konfirmon përmbushjen e standardeve më të larta të sigurimit të cilësisë në arsimin e lartë.

Në mesin e pesë institucioneve të arsimit të lartë nga Kosova që u vlerësuan në këtë ngjarje, Tempulli spikati si i vetmi kolegj privat që mori këtë njohje të rëndësishme.

Ky vlerësim e pozicionon Tempullin si institucionin e vetëm privat në Kosovë dhe të parin në historinë e arsimit të lartë privat që pranon një njohje të tillë nga AKA – një dëshmi e qartë e përkushtimit shumëvjeçar ndaj ekselencës akademike, inovacionit arsimor dhe zhvillimit të qëndrueshëm institucional.

Certifikata u pranua në emër të institucionit nga Prof. Dr. Muhamed Krasniqi, Drejtor i Kolegjit Tempulli, i cili theksoi rëndësinë e kësaj arritjeje për të ardhmen e institucionit dhe për gjithë komunitetin akademik:

“Ky vlerësim nuk është vetëm një dëshmi e cilësisë sonë, por edhe një përgjegjësi për të vazhduar të jemi udhërrëfyes në arsimin e lartë privat në vend dhe në rajon,” – u shpreh Prof. Krasniqi gjatë marrjes së certifikatës.

“Ndjehem fort i privilegjuar që e pranoj këtë mirënjohje dhe vlerësim për punën tonë të përbashkët, pikërisht në vigjilje të 33-vjetorit të themelimit të Tempullit – një moment historik dhe simbolik për institucionin tonë.

Një falënderim i posaçëm i shkon udhëheqësisë dhe ekipit profesional të Agjencisë së Kosovës për Akreditim për bashkëpunimin dhe mbështetjen e tyre të vazhdueshme.

Kjo mirënjohje u dedikohet gjithashtu kolegeve të mrekullueshëm të Kolegjit Tempulli, të cilët janë meritorët kryesorë për përmbushjen e standardeve të akreditimit dhe për avancimin e cilësisë në çdo aspekt të veprimtarisë sonë akademike.”

Suksesi i sotëm nuk përfaqëson vetëm një arritje institucionale – ai shënon një hap strategjik drejt konsolidimit, ndërkombëtarizimit dhe rritjes së qëndrueshme të Kolegjit Tempulli. Ky vlerësim forcon edhe më tej rolin e Tempullit si një adresë referuese për standarde të larta akademike, hulumtim aplikativ dhe zhvillim profesional në Kosovë dhe në rajon.